Dëshmitari i nëntë i mbrojtjes, Nuredin Ibishi, i njohur si komandant Leka, në gjykimin ndaj Salih Mustafës në Hagë, ka deklaruar se pa vullnet ka votuar pro miratimit të Gjykatës Speciale gjatë kohës kur ishte deputet dhe se ishin para dy dilemave.

“E dini fort mirë që kanë qenë akuzat për trafikim organesh, ndërkaq në hetimet preliminare të Williamson osht konstatu e dini fort mirë Shpija e Verdhë dhe akuzat që janë bërë dhe mbaron raporti i Willimason se nuk ka trafikim të organeve, por diçka tjetër”, tha dëshmitari.

Tutje, tha se kur Bosnja e Hercegovina e kanë ngritur çështjen e Srebrenicës në Asamble dhe me lobin pro rus e pro serb, e pro bjellorus, është refuzuar kërkesa e tyre për miratimin e rezolutës për gjenocid.

Ndërkaq, tha se lehtësisht është miratuar rezoluta për krimet e pretenduara të UÇK-së, raporton “Betimi për Drejtësi”.

“Atëherë kur isha deputet kam pas një shtojcë të them me bo një ndryshim që të luftohen të gjitha krimet që janë kryer në Kosovë, jo vetëm ato të pretenduara ndaj ushtarëve të UÇK”, tha Ibishi.

Tutje, ai tha se ka votuar pa vullnet për krijimin e gjykatës, pasi ishin para dy dilemave, a ta miratojnë dhe të gjykohen edhe vendet demokratike si Bashkimi Evropian apo të shkojë në Kombet e Bashkuara dhe të vijnë regjimet e Rusisë e Kinës dhe për këtë arsye ishte vota pro.

Fillimisht, dëshmitari Ibishi, pas një pauze, duke u përgjigjur në pyetje të prokurorit Cezary Mihailzcuk, ka deklaruar se sa ka njohuri, para mobilizimit të tërësishëm më 27 prill 1999, njësiti BIA nuk ka marrë pjesë në luftime.

Ndërkaq, u pyet nëse ka njohuri lidhur me një operacion të forcave serbe në rajonin e Gollakut në prill të vitit 1999, e ai konfirmoi këtë. Ndërkaq, tha se ka njohuri për krimet makabre që kanë ndodhur nga forcat ushtarake e paramilitare serbe nga Koliqi deri në Llukar.

Tutje, prokurori i tregoi një dëshmi dëshmitarit të Fatmir Sopit para trupit gjykues.

“Fatmir Sopi ka përmendur që BIA ka marrë pjesë në operacione luftarake. Pyetja a ju kujtohet që i keni thënë gjykatësit hetues dhe a është e vërtetë ajo që keni ditur për atë njësit. Përgjigja: po ja thash këtë gjykatësit hetues dhe po e përsëris që këto detyra janë ushtruar edhe nga njësitet guerilase të BIA-s dhe ajo ka shërbyer si furnizues jo vetëm për zonën operative të Llapit, por edhe njësitet tjera dhe kur ishte e nevojshme kanë marrë pjesë në luftime në betejat nga njësitet e brigadës 153 apo çfarëdo njësiti tjetër që ka marrë pjesë në beteja”, tha prokurori.

Kurse, tha se Salih Mustafa ka deklaruar se kur qëndronin për një ditë, dy apo tre, apo kur kanë ndihmuar në luftime, njerëzit që merrnin në luftime, pavarësisht a ishin 10 apo 30 persona, do të visheshin me uniformë, por bereta nuk ishte pjesë e uniformave për ushtarë.

Më pas, prokurori e pyeti nëse vazhdon t’i qëndrojë mendimit se ushtarët e BIA-s nuk kanë marrë pjesë në luftime ushtarake.

“Përveç asaj çka e kanë pas detyrën dhe mandatin, përveç datës 27 e tutje, unë nuk kam ditë për këto rastet të BIA-s që ka marrë pjesë në operacione luftarake me uniformë. Kjo pjesa e fundit për mu osht e paqartë po sido të jetë mendoj se BIA nuk ka pas mandatin të jetë pjesë e uniformuar në zbatimin e detyrave të veta në kuadër të pjesës urbane. Kjo pjesa po flet për pjesën rurale, tash këtu megjithëse është strukturë e paarmatosur, për këtë arsye e kam të paqartë në përkufizimin e krejt saj”, ka thënë dëshmitari.

Tutje, tha se e lidhë datën nga 27 prill që është bërë mobilizimi i tërësishëm është edhe mundësia që BIA të jetë e uniformuar dhe armatosur pasi është urdhri i tërësishëm për mobilizim, por se para kësaj date e ka të paqartë këtë çështje dhe nuk ka koment në kuptim të asaj.

Kurse, në vijim, iu tregua një pjesë e deklaratës së Ibishit dhënë prokurorisë, ku fliste për të paktën dy vende të tjera të ndalimit përveç asaj të Llapashticës.

“Në këto rreshta flitet për disa të ndaluar që u zhvendosën nga Llapashtica dhe prokurori u pyet pse u hoqën prej andej, pse u zhvendosën nga Llapashatica për t’u çuar në Majac dhe Potok, cila ishte arsyeja që u lëvizën. Ju u përgjigjët sepse do të ishin vrarë. A i folët prokurorit për ekzistencën e këtyre dy vendeve tjera në Majac dhe Potok”, pyeti prokurori.

“Flitet për një vend, për mbajtje të personave, edhe ai mund të lëviz prej sikurse është zhvillu zona prej Majacit në Llapashticë, flitet për një vend mbajtje, mirëpo me lokacion të ndryshëm, nuk flitet për dy vendmbajtje në të njëjtën kohë”, tha ai.

Tutje, Ibishi shtoi se është bërë transferimi prej një vendi në tjetrin.

“Njëra ka qenë për shkak të zgjerimit të operacioneve që e kemi zgjeru territori, por edhe në raste kur kemi bërë tërheqje prej sulmeve serbe për të mos rënë viktimë personat e mbajtur”, sqaroi dëshmitari Ibishi.

Dëshmitari theksoi ka pasur momente që kur janë zgjeruar kanë ardhur nga Majaci dhe zhvendosur në Llapashticë dhe kur bëhet ofensiva e madhe e serbëve, bëhet tërheqja e lokacionit, qendrës së mbajtjes nga Llapashtica në Potok.

Sërish, ai tha se nuk mbaheshin lokacionet në të njëjtën kohë dhe se ka qenë ose Majaci ose Llapashtica apo Llapashtica ose Potoku, ku ka qenë vetëm një qendër e mbajtjes për kohën e caktuar.

Sipas prokurorit, në çështjen Latif Gashi e të tjerët, dëshmitari Ibishi kishte deklaruar diçka sa i takon një vendndodhje të katërt ku mbaheshin personat e ndaluar nga UÇK në zonën operative të Llapit.

“Kryegjykatësi ju pyeti po për Bajgorën dhe Milovan Stankoviq dhe përgjigja juaj ishte ky ishte një burrë që u kap në aksion e sipër, u informova që erdhi në pozicionet tona, u kishte treguar armën ushtarëve dhe mendoj se do ta konsideronte veten me fat që s’ndodhi asgjë sepse ushtarët nuk e kuptonin gjuhën e tij, por në fund asgjë nuk ndodhi dhe ai u çua në Bajgorë. Pastaj vijon në faqen tjetër, faqe 12, kryegjykatësi pyet a kishte ndonjë njeri tjetër që u mbajt i ndaluar në këtë kohë në Bajgorë dhe përgjigja juaj ishte po kishim edhe Fadil Syleviqin që u mbajt në flagrancë e të tjerë i mbajtëm të ndaluar sepse dyshonim që po përpiqeshin të bënin struktura paralele kishin armë… kur i sollën atje i takova…”, lexoi tutje prokurori.

Tutje, prokurori tha se me sa duket ishin disa persona që mbaheshin të ndaluar në Bajgorë dhe në vijim u dhe një pjesë e dëshmisë të tij për Bajgorën.

“Është një pyetja nga gjykatësi hetues që ju drejtohet juve zoti Ibishi ishte si në vijim: a kishit dijeni për ndonjë civil që mbahej i ndaluar në Bajgorë aso kohe. Ju u përgjigjët, jo civil por kam dëgjuar për një grup ushtarët të paautorizuar, mund të jetë UÇK që vepronin në pjesën lindore të Prishtinës, që u arrestuan e çuan atje, ndër të ndaluarit ishin Fadil Syleviq që tani quhet Fadil Syla dhe Islam Shica”, tha ai tutje.

Prokurori tha se pavarësisht periudhave kohore, dëshmitari në të gjitha deklaratat flet për ekzistencën e disa vendndodhjeve ku mbaheshin të ndaluar persona, dhe e pyeti se a është kështu.

“Dëshmia ime osht se zona operative e Llapit e ka pas një vend për mbajtje të personave, vetëm në kohëra të ndryshme”, tha Ibishi.

Ndërkaq, gjykatësja Mappie Veldt- Foglia i tha se dëshiron të di nëse në këto katër vende janë mbajtur të ndaluar persona dhe nuk dëshiron të dëgjojë për zhvendosjen e vendeve të ndalimit dhe se dëshiron të përgjigjet nëse mbaheshin persona të ndaluar atje.

“Dua të shpjegoj se në kohëra të ndryshme, kemi pas vetëm një vendmbajtje”, tha sërish dëshmitari Ibishi.

Gjykatësja tha se për të “po” mjaftonte dhe se e kanë marrë parasysh çështjen e periudhave të ndryshme kohore dhe ka vënë re këtë pjesë të deklaratës së tij.

Ndërsa, Ibishi tha se procedurën gjyqësore në këtë rast e ka përcjellur, kurse i pyetur se cilët dëshmitarë i ka dëgjuar, ai tha se pjesërisht i ka ndjekur, si dhe përmendi se ka ndjekur dëshminë e Brahim Mehmetaj, të Fatmir Humollit pjesërisht.

“Këta dy nuk më kujtohen, tjerët, kam qenë pak i ngarkuar kohës së fundit”, tha ai.

Prokurori e pyeti nëse e ka ndjekur dëshminë e Kapllan Parduzit, kurse dëshmitari tha se e ka ndjekur një pjesë, një sekuencë.

Ndërsa, i pyetur se si do të përshkruante marrëdhëniet që ka me Parduzin, tha se ka marrëdhënie si bashkëluftëtar dhe mik dhe kanë kaluar çaste të përbashkëta dhe një moment që e lidhë me të është se një herë e ka harruar këmishën mbrojtëse dhe Parduzi i kishte dhënë të veten.

“Është një moment i sakrificës së tij që me atë potez më ka mbrojtë, se po se kisha atë nuk do të isha gjallë dhe ai pësoi”, tha dëshmitari Ibishi, si dhe konfirmoi se e konsideron mik të njëjtin.

Ndërkaq, hera e fundit që e ka takuar Parduzin, ai tha se ishte në Prishtinë, në një manifestim, ku u zbulua një pllakë përkujtimore, ku është mbajtur një ceremoni. Kjo sipas tij ka ndodhur ndoshta para dy apo tri jave, apo më pak.

Ky dëshmitar tha se çështjen e Salih Mustafës e ka diskutuar me Parduzin, ku kanë diskutuar shkurtimisht si po ecën procesi pasi nuk kishin kohë të mjaftueshme për të diskutuar më gjatë.

Tutje, tha se e di që Parduzi ka dhënë dëshmi për mbrojtjen, si dhe anasjelltas, që Parduzi di për dëshminë që Ibishi ka dhënë për mbrojtjen, por se nuk i kanë diskutuar me detaje të njëjtat.

I pyetur se çfarë marrëdhënie ka me Salih Mustafën, ai tha se janë bashkëluftëtar dhe asgjë nuk kanë personale dhe se e njeh si bashkëluftëtar dhe ka respekt për të edhe si veprimtar i çështjes kombëtare.

“Nuk kam shoqërim me të që të them e kam mik. Nuk kam shoqëri që dal pi kafe a diçka, jam bashkëluftëtar me të, asgjë s’kam më të madhe”, tha dëshmitari Ibishi.

Ai tha se armik nuk e ka dhe se as shoqërim të vazhdueshëm me të nuk ka dhe shtoi se nuk e ka takuar para arrestimit të tij.

“Kem mujt me u taku se Prishtina osht e vogël, takohemi kalimthi, përshëndetemi, nuk kam pas takim të veçantë me të”, tha Ibishi.

Ndërkaq, tha se ndaj lajmit të arrestimit të Mustafës ka reaguar me keqardhje.

“Po mendoj një pjesë të ushtrisë, ky është procesi i pestë, katër në Kosovë, ky i pesti, nejse tri në Kosovë dhe dy jashtë. Na prej rolit të viktimës po kthehemi si agresor dhe kjo po shkon në pafundësi”, tha ai.

Ibishi mohon t’i ketë dhënë urdhra Salih Mustafës apo dikujt nga njësiti BIA

(Përditësuar, ora 16:02)- Dëshmitari Nuredin Ibishi, i njohur si komandant Leka, në gjykimin e së martës, në rastin e Salih Mustafës, ka instistuar se nuk i ka dhënë urdhra Salih Mustafës, edhe kur nga prokurori Cezary Mihailzcuk iu treguan pjesë të deklaratës së Fatmir Humollit e vet Salih Mustafës që sipas prokurorit thonin të kundërtën e asaj çka po thotë Ibishi.

Fillimisht, duke u përgjigjur në pyetje të prokurorit Cezary Mihailzcuk, dëshmitari Ibishi ka deklaruar se nofka “Korabi” i përkiste Kapllan Parduzit.

Pozita e Latif Gashit në UÇK aso kohe, ai tha se ishte shef i zbulimit dhe kundër zbulimit në kuadër të zonës operative të Llapit.

Ndërkaq, konfirmoi se i kujtohet pjesë nga deklarata që i ka dhënë mbrojtjes në vitin 2021, për çka tha se e ka thënë të vërtetën.

Më pas nga prokurori u citua një pjesë e deklaratës, ku Ibnishi kishte thënë “Latif Gashi ishte përgjegjës të shikonte rreth e rrotull dhe eventualisht, përfundimisht u evakuuam dhe u transportuam drejt spitalit”. Këtë deklaratë të cituar, dëshmitari Ibishi e ka konfirmuar, si dhe tha se i ka treguar të vërtetën mbrojtjes.

Më pas, iu tregua një dokument tjetër, që i përket të njëjtës temë, një deklaratë para një gjykatësi hetues në çështjen e Latif Gashit e të tjerëve në Gjykatën Themelore në Prishtinë më 26 gusht të vitit 2002.

“Gjendet pyetja e përgjigja pasuese. Gjykatësi hetues: me sa kuptoj unë nga dëshmia juaj e mëparshme, ju jeni plagosur në muajin maj, ju u përgjigjët : jo unë jam plagosur me 9 prill dhe 2 apo 3 ditë më vonë më dërguan në Spitalin Ushtarak të Potokut me ndihmën e Latës dhe bashkëluftëtarëve të tij”, tha citoi prokurori.

I pyetur se a konfirmon se ia ka thënë këtë gjykatësit hetues, dëshmitari tha se me siguri që po, ndërkaq i pyetur se a ishte Lata ai që e kishte ndihmuar gjatë transportimit nga Turuçica në Potok, dëshmitari Ibishi e konfirmoi këtë dhe tha se “Lata” është nofka e Latif Gashit.

Tutje, iu kërkua të tregoj hollësi të mëtejshme lidhur me lëndimet e tij.

“Ka qenë lëndime të rënda, në kuptim të asaj, ashtu si kanë trajtue ata mjekët, nuk është çështje e ime. Jam plagos nga një armë që me konventa ndërkombëtare është e ndaluar, ka të bëj me pragën 30 mm që e ka efektin sekondar, që shkakton pasoja të rënda, sidomos ka shkaktu te civilët dhe në këtë rast te unë dhe bashkëluftëtari im Korabi. Për këtë arsye, them se lëndimet janë të karakterit të rëndë”, sqaroi Ibishi.

Plagët e tij, ai tha se i mori në stomak dhe në pjesën e shpinës, ku ende i ka mbetjet, si dhe në vesh tha se ende e ka një pjesë të fragmentit të eksplozivit.

Ai konfirmoi se gjendja e Parduzit ka qenë më e keqe se sa ajo e tij.

“Të them të dytë ishim në gjendje të rëndë, për me bo nivelizimin se cili është rëndë e më rëndë, nuk kam një vlerësim, por po them se ka qenë më rëndë se unë, dytë kemi qenë në gjendje jashtëzakonisht rëndë, po të mos shkonim me kohë në spitalin ushtarak dhe t’i nënshtroheshim operimit do të vinte te sepsa. Për kundër operimit që u bë pas dy ditëve që folëm, te ai u ngadalësua aspekti i shërimit në të vërtetë i trajtimit, për këtë arsye po them se gjendja e tij prej dy gjendjeve të rënda, ai e ka pas më të rëndë”, tha dëshmitari Ibishi.

Tutje, ai tha se s’po kupton fare se pse është e rëndësishme se cili ishte më rëndë dhe nuk ka asnjë kuptim kjo dhe sipas tij është edhe ofenduese, duke shtuar se qenka dashur të merrte fotot nga operimi për të parë sa e rëndë ka qenë gjendja.

“Nuk po i vë në pikëpyetje dëmtimet se sa të rënda kanë qenë ato të juajat apo Parduzit. Dua t’i tregoni trupit gjykues çka mbani mend nga ai udhëtim”, tha prokurori.

Tutje, kryetarja e trupit gjykues, Mappie Veldt- Foglia, tha se askush nuk po e ofendon dhe se të gjithë do të trajtohen me respekt.

Ibishi tha se nëse dëshiron trupi gjykues mund t’i sjellin fotografitë për të parë ndërhyrjen e operacionit dhe në çfarë gjendje kanë qenë. Por, kryetarja e trupit gjykues tha se dëshirojnë të përgjigjet në pyetje dhe nëse do të donin fotografitë do t’i kërkonin.

“Dytë kemi qenë në vazhdimësi duke humbur gjak. Ka të bëj me lëndimin e organeve të brendshme të stomakut, s’di a jam i qartë”, tha tutje Ibishi.

Ndërkaq, i pyetur se a ka pasur gazë apo fashë në kokë Parduzi, dëshmitari Ibishi tha se nuk i kujtohet.

Dëshmitari Ibishi tha se realisht për shkak të largësisë në krahasim me vetndodhjen të komandës së zonës, por edhe shtabit dhe pamundësinë që të qarkullojnë në pjesën urbane, kanë bërë ndalimin e rreptë të udhëtimit ngase kanë pësuar pesë luftëtarë të tyre që janë vrarë në Prishtinë në mënyrë arbitrare nga forcat serbe.

“Mundësia jonë për të udhëtuar në zona urbane ka qenë rreptësishtë e ndaluar. Nuk kemi dashur të hapim konflikt në zona urbane për shkak të popullatës. Edhe largësia gjeografike dhe qasja e pamundësisë në hyrje të zonave urbane nuk kemi pas këmbim të raporteve dhe dhënieve të urdhrave përveç rasteve kur kemi pas nevojë për shërbime nga ta”, tha ai, duke u përgjigjur në pyetjen se a i ka raportuar BIA zonës operative të Llapit.

Tutje, ai tha se ka mundur të kenë raporte me dikë të stafit të komandës dhe kur BIA ka ofruar shërbime për nevoja shëndetësore, të personelit, logjistikës dhe çështje tjera, nuk ka qenë e nevojshme në aspektin e komunikimit drejt me të apo dikë prej komandës të caktuar, përveç asaj të shërbimeve specifike që ka kryer BIA për nevoja të zonës operative të Llapit.

Ai konfirmoi se ka thënë se ka kontaktuar me një person që mund të ishte nga BIA me emrin Rrahman Dini.

“A ka ardh dikush tjetër nga BIA gjatë kohës së luftës që të raportonte para jush”, ka pyetur prokurori Mihailzcuk.

“Po jo, jo raportu, po ka kryer shërbime të ndryshme në kuadër të nevojave të zonës operative të Llapit, mos t’i përmendi ato që i thash më parë”, u përgjigj Ibishi.

Ai tha se BIA nuk ka pasur të marr urdhra dhe ka kryer shërbime në bazë të nevojave që ka pasur zona, që ku është treguar nevoja, janë bërë kërkesa të komandanti i këtij njësiti dhe i njëjti i ka shërbyer.

Dëshmitari mohon se i ka lëshuar ndonjë urdhër Salih Mustafës. Ndërkaq, i pyetur si e dinte që Mustafa ishte komandant i BIA-së, ai tha se Cali është veprimtar i njohur i çështjes kombëtare, ku ka qenë edhe i burgosur politik dhe i angazhuar në njësitin BIA, ku edhe pse se ka njohur personalisht, ka pasur njohuri lidhur me veprimtarinë dhe aktivitetet e tij.

Sipas tij, ai gjatë luftës e ka takuar Salih Mustafën, por nuk e ka njohur.

“Duke pas parasysh që se kam njoft ma herët, atëherë personalisht nuk e kam njoft. Kam mujt nashta me pa dhe me kalu, duke mos e njoft ma herët, duke mos pas njohuri personale me të”, tha ai.

Tutje, ai tha se i ka thënë të vërtetën prokurorisë në deklaratën e tij të dhënë për ta për këtë çështje.

Pas kësaj, u tregua deklarata e Salih Mustafës dhënë për prokurorinë, ku citoi një pjesë të saj kur ishte diskutuar për marrjen e urdhrave.

“Se mbaj mend saktësisht, mund të ju them me kë takohesha për të marr urdhrat.. merrnim urdhrat nga shtabi i nën-zonës, pyetja ishte kush ishte, ju përmendët Rrustem Mustafën, përgjigja: Rrustem Mustafa, Kadri Kastrati, pyetje: Nuredin, përgjigja: Nuredin Ibishi”, citoi prokurori.

Tutje, prokurori vazhdoi me citim tjetër të deklaratës, ku po ashtu diskutohej për marrje të urdhrave, ku sërish ishte përmendur Nuredin Ibishi.

“Nga këto dy pjesë ngjason, duket, se së pari Salih Mustafa merrte urdhra prej Nuredin Ibishit, ju thatë që ju nuk i jepnit urdhra Salih Mustafës. A po thoni se Salih Mustafa ka gënjyer në deklaratën e tij”, pyeti prokurori.

“Nuk them dhe ai është qëndrim i juai dhe interpretim i juaji. Nëse më pyetni as unë nuk mund të jap përgjigje, e jep Salih Mustafa. Thotë e marrim nga sektorët, qendra opertive dhe sektorët, dot a interpretoj zoti Mustafa se sektor janë shërbimet, ai shëndetësor, logjistika, personeli dhe për këtë arsye unë nuk kam qenë udhëheqës i sektorit, por shef i operativës. Ndoshta është gabim në interpretim”, tha tutje Ibishi.

Ndërkaq, prokurori tha se nuk është gabim pasi Mustafa flet për operativën dhe ai thotë se shefi i sektorit e kontaktonte, Nuredin Ibishi. Kurse, Ibishi tha se asnjëherë nuk ka qenë shef sektori.

“Ai nuk thotë pozitën, thotë emrin tuaj këtu”, tha prokurori.

“Nuredin Ibishi nuk ka qenë udhëheqës sektori, ka qenë shef i operativës dhe ka qenë varësisht prej kohës komandant i brigadës apo shef i shtabit, asnjëherë nuk ka qenë shef sektori. Është e vërtetë se Mustafa ka marrë urdhër prej sektorëve, shëndetësisë, logjistikëks, dhe këtë duhet të dallohet”, tha ai tutje.

Ibishi sërish mohoi se i ka dhënë urdhra Mustafës.

Tutje, në një deklaratë në një tjetër çështje gjyqësore, sipas prokurorit i pyetur Mustafa nëse i raportonte drejt komandant Remit, ai kishte mohuar këtë.

“Ndërkaq i pyetur se kujt i raportonte, thuhej se kryesisht raportimet ja përcjellin shefit të shtabit, pyetje: nga cili merrje urdhrat, Salih Mustafa: nga shtabi i zonës, ishte shefi i shtabit, ose me telefon satelit ose radio. Në çështjen Agron Zeqiri, Salih Mustafa thotë se i raportonte shefit të shtabit, juve zoti Ibishi”, tha prokurori.

“Nuk dua të interpretoj deklaratën e tjetërkujt”, tha dëshmitari Ibishi.

Ibishi u pyet nëse thotë se Mustafa gënjen kur thoshte se i raportonte shefit të shtabit.

“Deklaratat secili i interpreton të vetat, edhe njëherë po ju them, mos mu deklaroni mua me deklarata fyese për Salih Mustaf”, tha ai, e më pas u ndërpre nga gjykatësja që i kërkoi të kontrollonte tonin e zërit.

Tutje, dëshmitari Ibishi sërish tha se nuk i ka dhënë urdhra Salih Mustafës dhe se nuk dëshiron të interpretoj deklaratën e tjetërkujt.

Prokurori i ka treguar Ibishit një deklaratë tjetër të një dëshmitari që ka dhënë dëshmi para këtij trupi gjykues, konkretisht Fatmir Humollit, me 2 shkurt 2022.

“Pyetja: cili në zonën operative të Llapit në komandë pra kujt i raportonte BIA në zonën operative të Llapit, përgjigja komandantit të zonës operative të Llapit dhe shefit të zonës operative të Llapit, pyetja cili ishte shefi: përgjigja: Nuredin Ibishi ishte shefi i komandës operative, pyetja cila ishte pozita e tij ekzakte, a mund të na tregosh, përgjigje: po flas për Nuredin Ibishi, pyetje: ishte shefi i operativës, pyetja: Pra ose nga Rrustem Mustafa ose nga Nuredin Ibishi, përgjigja: po”, lexoi prokurori.

Kurse, dëshmitari tha se nuk ka dhënë urdhër e se a ka mundur të jap urdhra është çështje tjetër, por se përgjigja e tij strikte është se nuk ka dhënë urdhra, duke shtuar se nuk i ka dhënë urdhra as Mustafës e as ndonjë anëtari tjetër të njësitit BIA-së.

Ndërkaq, konfirmoi se po të kishte pasur nevojë të jepte urdhra, ai ka mundur të jap, por se çështja është se ai nuk ka dhënë urdhra.